Kreef oor die Kole

Johan Carossini, eienaar van die Paternoster Hotel aan die Weskus, is 'n kampioen-kreef-braaier. Ek het daar by sy plek 'n onvergeetlike koslas gaan maak, Só werk sy geheim, sonder fieterjasies, nes Johan ook is:

rou krewe

suurlemoensap

vars, gekapte pietersiellie

Bedruipsous vir 6 Krewe

250 ml (1 k) botter, gesmelt

1 groot suurlemoen se sap

5 ml (1 t) gemengde gedroogde kruie

5 ml (1 t) gekapte knoffel - opsioneel

Metode
Sny die krewe ruglangs met 'n skêr of mes oop sonder om regdeur die kreef te sny. Breek die kreef verder oop en druk dit plat sodat die vleiskant na bo lê. Haal die dermpie uit die stert. Meng die bestanddele vir die bedruipsous. Plaas die krewe op 'n rooster, bedruip die vleiskant mildelik met die bedruipsous en laat dit 5 minute lank sodat die sous deeglik intrek. Plaas die rooster met vleiskante na onder op 'n staander. 30 cm hoog en braai die kreef 3 minute lank oor matige kole. Draai dit om, bedruip dit mildelik en braai dit 5 tot 6 minute lank met die dopkant na onder. Bedruip dit weer voor bediening. Sprinkel suurlemoensap oor en strooi pietersielle oor.