Pasta Arrabbiata

(6 porsies)

Noem die naam Marcello Fiasconaro en atletiekentoesiaste onthou hom dadelik as die Suid-Afrikaner wat in 1973, tydens die isolasiejare, ons naam hoog gehou het en in Rome 'n nuwe wêreldrekord van 1 min. 43,7 sek, in die 800 m opgestel het. Ek het 'n tyd gelede by hom in Johannesburg gaan kuier, kopstukke gesels en hierdie koslas daar gemaak. Die woord arrabiata dui aan dat dit brand. Hierdie is dus 'n pastagereg met 'n byt.

60 ml (4 e) olyfolie

15 ml (1 e) gekapte knoffel

4 bird eye- gedroogde brandrissies, fyn gekap

of

2 vars rooi brandrissies, gekap

2 x 410 g gekapte tamaties met origanum en

basielkruid (2 blikke)

125 ml (1/2 k) vars, gekapte pietersielle

sout en varsgemaalde swartpeper na smaak

500 g penne-pasta of spaghetti

Metode

Verhit die olyfolie in 'n pan oor matige hitte. Voeg die knoffel in fyngekapte brandrissies by en roerbraai dit totdat die knoffel begin verkleur. Voeg die tamaties en pietersielle by. Druk die tamaties fyn en geur dit met sout en peper na smaak. Laat prut dit oor lae hitte - 1 uur lank of totdat die sous verdik. Roer dit gereeld. Verhit 2 liter water, waarby 5 ml (1 t) sout gevoeg is, tot kookpunt in 'n kastrol. Voeg die penne of spaghetti by en laat kook dit 10 minute lank. Roer dit gereeld. Dreineer die pasta en skep dit terug in die kastrol. Skep die tamatiemengsel oor en meng dit deeglik. Skep dit in 'n opdienbak en geniet.

Wenk

Gedroogde brandrissies is sterk, Indien die kinders saameet, kan die monde brand. Ek waarsku net.!